Ховд аймгийн Улаан загалмайн хорооны удирдах зөвлөл өнөөдөр хуралдлаа. Хурлын хүрээнд өнгөрсөн 2022 онд хийж хэрэгжүүлсэн ажлын тайлантай танилцаж, цаашдын үйл ажиллагааныхаа талаар хэлэлцэв.

Улаан Загалмайн Хорооны ажил үйлчилгээг явуулахад олон талын оролцоо, дэмжлэг чухал байдаг. Иймээс цаашид талуудын хамтын ажиллагаа, идэвх санаачилгыг өргөжүүлэн бэхжүүлэх, ард иргэдийг хүмүүнлэг энэрэнгүй үйлс сайн дурын ажилд нэгтгэх, гишүүнчлэлийн тоог нэмэгдүүлэхэд анхаарч, ялангуяа хөдөө орон нутагт чиглэсэн ажлуудаа эрчимжүүлэхээр боллоо.

Энэ удаагийн хурлын үеэр байгууллагын нөөц хөгжүүлэх, орлого нэмэгдүүлэх чиглэлээр хийх ажлын талаар хэлэлцлээ.

Мөн сумдын анхан шатны хороодын нарийн бичгийн дарга нарыг томилгоожуулах тухай, улс аймаг сумын аварга сайн малчин тариаланчдыг шалгаруулахад хүмүүнлэгийн байгууллагад оруулсан хувь нэмрийг үнэлэн үзүүлэлт болгох тогтоол шийдвэрийг шинэчлэн боловсруулах тухай зэрэг хэд хэдэн асуудлыг хэлэлцэж, санал солилцов.

Улмаар Ховд аймгийн Улаан загалмайн хороо 2023 онд 7 бүлэг бүхий 56 ажлыг хэрэгжүүлэхээр төлөвлөлөө.