“ЯГ ӨНӨӨДРӨӨС ГЭР БҮЛДЭЭ” СЭДЭВТ ГЭР БҮЛИЙН ЗӨВЛӨГӨӨН БОЛЛОО

ИТХ, ЗДТГ-аас Гэр бүлийн сарын аяны хүрээнд Олон улсын гэр бүлийн өдрийг тохиолдуулан гэр бүлийн зөвлөгөөн зохион байгуулахаар удирдамж, хөтөлбөр боловсруулан батлуулж ажиллаа. Гэр бүлийн өдрийг тэмдэглэн өнгөрүүлснээр хүүхдүүд эцэг эхтэйгээ үзэл бодлоо чөлөөтэй илэрхийлэх боломж бүрдэх, эцэг эхийн хайр халамжийг мэдрэх, чөлөөт цагаа зөв боловсон өнгөрүүлдэг болох, гэр бүлийн халуун дулаан эерэг уур амьсгал бүрдэх, гэр бүл төлөвлөлт төсөвлөлт сайжрах, гэр бүлийн гишүүд харилцан бие биенээ хүндэтгэж сурах, сургаал, ёс заншил, өв уламжлал, ураг төрлөө дээдэлж, гэр бүл тогтвортой бат бөх болох гэх мэт олон эерэг дагаврууд гарах юм.
Зөвлөгөөнөөр өрх гэр бүл халамжийн нийгмийн ажилтантай хамтран ажиллах , түүний дэмжлэг туслалцааг авах, гэр бүлийн өнөөгийн байдал, гэр бүл- эрүүл мэнд, гэр бүл- боловсрол, гэр бүл- хууль эрх зүй, гэр бүл- хуримтлал, гэр бүлд тулгамдаж буй асуудлын талаар хэлэлцэн зөвлөлдөв.
Зөвлөгөөний үеэр Гэр бүл судлаач Ж.Баясгалан “Яг өнөөдрөөс гэр бүлдээ” лекц тавьж, Сумын улсын бүртгэгч шинээр гэр бүл болсон залуу хосуудынхаа аз жаргал хүсч, бие биедээ үнэнч байж тогтвортой бат бөх гэр бүл байхыг бэлгэдэн “Гэр бүлийн Андгай” өргүүлж гэрлэлтийн батлахыг ёслол төгөлдөр гардуулж, ЕБС, хүүхдийн цэцэрлэгийн сурагчид зөвлөгөөнд оролцож буй гэр бүлүүдэд амжилт хүсч мэндчилгээ дэвшүүлээ.
Зөвлөгөөний үр дүнд өнөөгийн нийгмийн гэр бүлүүдэд тулгамдаж байгаа бэрхшээл,түүнээс гарах арга замуудыг тодорхойлсон, зөвхөн гэр бүлүүдэд чиглэсэн арга хэмжээ болж өндөрлөлөө. Зөвлөгөөнд оролцогчдоос гарсан санал санаачилга, уриалгыг ЗДТГ-т нэгтгэж уриалгын төслийг боловсрууллаа.
Зөвлөгөөн зохион байгуулахад Өгийнуур сумын ИТХ, ИТХ-ын төлөөлөгчид, Архангай аймгийн ГБХЗХГазар, ЭМТ, ЕБС, Өгий мандал ХЗХ, Хүүхдийн цэцэрлэг, Сумын хүүхдийн элч Д.Галбадрах зэрэг байгууллага, албан хаагчид дэмжиж хамтран ажиллаа.