Хилээр гурил, улаанбуудай оруулж ирэхийг хориглосноос шалтгаалан алслагдсан аймгууд тэр дундаа Ховд аймгийн иргэд гурилыг өндөр үнээр худалдан авч, хохирсоор байна. УИХ-ын чуулганы нэгдсэн хуралдаанаар энэ асуудлыг УИХ-ын гишүүн С.Бямбацогт хөндөж, асуудлыг шийдэх гарцыг хэлсэн юм.
Тэрээр “Баруун аймгуудын хилээр гурил оруулж ирэхийг яагаад орхигдуулав аа. Баруун аймгуудад гурилын үйлдвэр байхгүй тул гурил үйлдвэрлэх боломжгүй. Улаанбаатарт үйлдвэрлэсэн гурилыг 1500 км зайд зөөвөрлөх тээврийн хөлснөөс хамаараад үнэ багагүй нэмэгдэн иргэдэд очиж байна. Улаанбаатарт 1 кг гурил 1000 төгрөг байхад Ховд, Баян-Өлгий зэрэг аймгуудад гурил 1300 төгрөг байна. Өнөөдөр улаанбуудайг хилээр оруулж ирэхэд гаалийн болон нэмэгдсэн өртгийн албан татвараас чөлөөллөө. Энэ үед бусад газруудад улаанбуудай, баруун аймгуудад Цагаан нуурын боомтоор гурилыг татваргүй оруулж ирнэ гээд зохицуулах боломж байна шүү дээ. Иргэд маань хохирч байна” гэсэн юм.
Энэ асуудалд ХХААХҮ-ийн сайд Б.Батзориг хариулахдаа “Үндэсний үйлдвэрлэлээ дэмжих ёстой, эх орныхоо гурилын хэрэгцээг хангана гээд энэ асуудлыг тань ажлын хэсэг хуралдах үеэр дэмжээгүй” гэлээ.